|رپورٹ: پروگریسو یوتھ الائنس، ملتان|
پنجاب کے دیگر شہروں کی طرح ملتان میں بھی انٹرمیڈیٹ پارٹ ون کے نتائج کے خلاف مظاہرے جاری ہیں کل جمعہ کے دن پریس کلب کے سامنے اور آج ملتان بورڈ کے سامنے بھی احتجاجی مظاہرے کئے گئے۔
مظاہرے میں ملتان میں واقع مختلف کالجوں کے طلبہ نے حصہ لیا اور ہفتے کو اعلان ہونے والے انٹر پارٹ ون کے نتائج کو مسترد کردیا ۔ طلبہ کا مطالبہ تھا کہ انٹر میڈیٹ پارٹ ون کے نتائج کو منسوخ کیا جائے اور پیپرز کی ری کاؤنٹنگ کی بجائے ری چیکنگ کی جائے۔ طلبہ نے مزید کہا کہ اس بار کا رزلٹ بالکل غلط ہے کئی سٹوڈنٹس کو100 میں سے 101 اور 85میں سے 87 نمبر دیئے گئے ہیں۔
ان کا کہنا تھا کہ ہمارے مستقبل کے ساتھ کھلواڑ کیا گیا ہے، ہم اس نا انصافی کا حساب لیں گے اور تب تک احتجاج کا سلسہ جاری رکھیں گے جب تک ہمارے مطالبات پورے نہیں ہوتے۔احتجاجی مظاہرے میں 300 کے قریب طلبہ نے شرکت کی ۔اس موقع پر پروگریسو یوتھ الائنس کی ٹیم نے احتجاج میں نہ صرف مداخلت کی بلکہ اسے منظم کرنے میں بھی کلیدی کردار ادا کیا۔ان کا کہنا تھا کہ وہ اس جدوجہد کی حمایت کرتے ہیں اور ہر قدم پر اس کا ساتھ دیں گے۔
